Umani ng iba't ibang reaksiyon ang Facebook post ng BJMP Baguio City Jail Female Dormitory matapos magtanong ang isang bakasyunista kung may bakante pa umanong 'unit' sa kanilang pasilidad.
Sa ibinahaging screenshot ng BJMP, makikita ang ipinadalang mensahe ng bakasyunista sa FB page ng jail dormitory na nagtanong kung may mga “available units” pa sa kanilang establisimyento, sa pag-aakalang isa itong accommodation sa Baguio City.
Agad itong sinagot ng pamunuan ng piitan at sinabing kulungan ng mga babae ang naturang pasilidad na may kasama pang smiling emoji.
Humingi naman ng paumanhin ang bakasyunista nang malaman niyang kulungan pala ang kaniyang napagtanungan.
Dahil dito, marami ang natawa sa naturang palitan ng mensahe, kung saan nagbahagi rin ang ilan ng kani-kanilang komento sa social media.
Kasabay nito, nagpaalala naman ang BJMP na hindi hotel ang mga jail facilities nito at tiniyak na patuloy nilang pananatilihing ligtas at maayos ang kanilang mga pasilidad para sa kapakanan ng mga PDL, alinsunod sa mandato ng ahensya.
