Pormal nang pinatawan ng parusa ng Kamara si Quezon City Representative Jesus "Bong" Suntay dahil sa kanyang "nag-init" remarks sa aktres na si Anne Curtis.
Sa botong 263 affirmative, 8 against at 7 abstentions, in-adopt ng Kamara ang committee report ng Committee on Ethics and Privileges.
Batay sa rekomendasyon, nais ng Ethics panel na patawan si Suntay ng reprimand, public apology sa aktres, voluntary community service at pagdalo sa gender sensitivity seminar.
Ayon kay Ethics Panel Chairman JC Abalos, bagama't na-strike off na sa record ng House Committee on Justice ang mga pahayag ni Suntay, paulit-ulit pa rin itong napapanood ng publiko sa broadcast platforms.
Naapektuhan aniya ang institusyon dahil sa mga pahayag na ito ng kongresista.
Mababatid na nasabi ito ni Suntay bilang analogy sa pagdinig ng Committee on Justice noong Marso sa impeachment complaint laban kay Vice President Sara Duterte sa alegasyon ng "kill plot" kay Pangulong Bongbong Marcos.
#
