Tiniyak ng Bureau of Corrections (BuCor) na nananatili sa kanilang kustodiya ang convicted retired Major General Jovito Palparan.
Ito ay kasunod ng mga kumalat na ulat na inilipat umano si Palparan sa Philippine Military Academy (PMA) at mga panawagan ng pamilya ng mga desaparecidos na ilantad ang kanyang kinaroroonan.
Kasabay nito, naghain ng manifestation at motion sa Korte Suprema ang mga pamilya nina Sherlyn Cadapan at Karen Empeño upang hilingin sa mataas na hukuman na kumpirmahin ang kinaroroonan ni Palparan.
Nanawagan din ang grupong Karapatan na ilantad ang eksaktong lokasyon ng retiradong heneral at tiyakin na hindi ito binibigyan ng espesyal na pagtrato.
Binigyang-diin ng grupo na dapat tiyakin ng pamahalaan na tuluy-tuloy na ipinatutupad ang hatol laban kay Palparan kaugnay ng kidnapping at serious illegal detention ng dalawang estudyante ng University of the Philippines noong 2006.
Ayon kay BuCor Director General Gregorio Catapang Jr., nananatili si Palparan sa New Bilibid Prison (NBP) at patuloy na nagsisilbi ng kanyang sentensya.
Si Palparan ay nagsisilbi ng sentensyang reclusion perpetua matapos mahatulang guilty sa kaso ng pagkawala nina Cadapan at Empeño.
Noong 2022, pinagtibay ng Court of Appeals ang hatol laban kay Palparan at inalis ang posibilidad na makapag-avail siya ng parole.
