Pinalaki ng lokal na pamahalaan ng GenSan ang budget para sa 2024 Tuna Festival kasabay ng paghahanda ng mga malalaking aktibidad.
Ayon kay Joey Concepcion, Executive Assistant ng City Mayor’s Office, nasa P15 milyon ang pondo ng LGU para sa festival.
Mas mataas ito kumpara sa P9 milyon na budget ng festival noong nakaraang taon.
Inamin din ni Concepcion na may mga pagbabago silang ipapatupad.
Kabilang dito ang pagtanggal ngayong taon ng float parade at isa sa mga highlight ng Tuna Festival noon na Fish Fest sa Fishport complex.
Ipinangako niya ang engrandeng selebrasyon para sa ika-26 na taon ng Tuna Festival tulad ng pagdala ng malaking artista para sa mga concert.
Kasama rin ang pagpapalawak ng kilalang Sugbahan sa Dalan, kung saan inaasahang maraming isda ang ilalagay sa Pioneer Avenue.
Sa kabila nito, tiniyak ni Concepcion ang kahalagahan ng mga mangingisda kasabay ng selebrasyon na dahilan ng pagkilala sa GenSan bilang Tuna capital ng Pilipinas.
Samantala, aabot din sa 1,000 police personnel, sundalo, at iba pang force multiplier ang ipapakalat sa mga venue ng event.
