Nangangamba ang ilang grupo ng mga negosyante sa posibleng epekto ng lumalalang tensyon sa Middle East sa ekonomiya ng Pilipinas at sa mamamayang Pilipino.
Ayon sa Philippine Chamber of Commerce and Industry (PCCI) at Philippine Exporters Confederation Inc. (Philexport), maaaring magdulot ng malawakang epekto sa pandaigdigang supply chain ang nagpapatuloy na giyera sa Gitnang Silangan, kaya nakikiisa sila sa panawagang tigil-putukan at diplomatikong solusyon.
Binigyang-diin ng dalawang grupo ang posibleng epekto ng krisis sa export sector ng bansa, lalo na’t 100 porsyento ng inaangkat na krudo ng Pilipinas ay nagmumula sa Middle East.
Nagbabala naman ang PCCI na maaaring magresulta sa panibagong pagtaas ng inflation ang pagsipa ng presyo ng langis at posibleng pagbaba ng remittances, kung saan pinakamaaapektuhan ang micro, small, and medium enterprises (MSMEs) na may limitadong puhunan.
Dahil dito, nanawagan ang mga grupo sa pamahalaan na mahigpit na subaybayan ang sitwasyon at magpatupad ng agarang hakbang upang mabawasan ang negatibong epekto nito sa exporters at sa kabuuang ekonomiya ng bansa.
Tiniyak din ng PCCI ang kahandaan nitong makipagtulungan sa pamahalaan, industry associations, at mga international partner upang harapin ang krisis at gawing sentro ng tugon ang kaligtasan at kapakanan ng bawat Pilipino sa ibang bansa.
