Pansamantalang magpapahinga sa tungkulin si Cainta Mayor Kit Nieto matapos matuklasan ng mga doktor ang ilang pagbabara sa kanyang mga ugat.
Ayon sa pahayag, isinugod sa ospital ang alkalde matapos makaranas ng matinding pananakit ng dibdib at kasalukuyang nasa medikal na obserbasyon.
Sa ngayon, pinag-aaralan pa ni Mayor Nieto at ng kanyang pamilya ang angkop na gamutan o posibleng operasyon na isasailalim sa kanya.
Dahil dito, itinalaga muna si Vice Mayor Ace Bernardo Servillon bilang acting mayor habang nagpapagaling si Nieto.
At ipinagpaliban muna ang lahat ng naka-iskedyul na aktibidad ng alkalde, kabilang ang mga okasyon kaugnay ng kanyang kaarawan sa Enero 31.
Nagpaabot naman siya ng pasasalamat at pagbati sa mga taga-Cainta at nangakong babalik sa serbisyo sa sandaling payagan ng kanyang mga doktor.
Mababatid na si Nieto ay kasalukuyang nagsisilbi sa kanyang ika-apat na termino bilang Mayor ng Cainta.
Pinamunuan niya ang munisipalidad mula 2013 hanggang 2022, naging municipal administrator sa ilalim ng kanyang asawa na si dating Mayor Ellen Nieto, mula 2022 hanggang 2024, at muling nahalal bilang mayor noong 2025.
