Naniniwala si Palace Press Officer Claire Castro na kailangan na munang tapusin ang lahat ng mga videos ni Zaldy Co dahil kitang-kita umano ang mga inconsistencies dito.
Kasunod ito ng bagong alegasyon ng dating kongresista na sangkot din 'di umano ang presidential son na si House Majority Leader Sandro Marcos sa mga budget insertions.
Sa Palace press briefing, sinabi ni Castro na kagaya raw ng pabago-bagong hairstyle ni Co ay pabago-bago rin ang kaniyang mga pahayag.
Inihalimbawa nito noong videos 1 and 2 ni Co ay hindi raw nito nabanggit ang mga transaksyon noong 2022 at nagsimula ang pakikipag-usap 'di umano kay dating Budget secretary Amenah Pangadaman noong 2024.
At noong nasita raw ang kaniyang inconsistencies ay nagbago na raw ang kuwento nito.
Sa huli, inulit nito ang panawagan ni Pangulong Bongbong Marcos na umuwi na lang si Co sa Pilipinas, at harapin niya ang mga kaso.
