Nababahala si Cagayan De Oro City Representative Rufus Rodriguez sa napakadaling access ng pagsusugal sa mobile phones pati na ang paglipana ng pag-endorso rito sa kasalukuyang panahon.
Sa kanyang privilege speech sa plenaryo, pinuna ni Rodriguez ang aniya'y 24/7 access sa smartphones ng mga sugal gaya ng casino at sabong nang walang age restrictions.
Batay sa 2025 study ng Digital Risk Observatory, tinatayang tatlumpu't apat na milyong Pilipino umano ang nagsusugal online kung saan 64 percent sa mga ito ang umaming ginagawa nila ito araw-araw.
30 percent din ng users ay kinse anyos pa lang at karamihan ay nagsimulang maglaro bago maglabingwalong taong gulang.
Naniniwala ang kongresista na bigo ang mga batas at digital systems na protektahan ang mga kabataan ngunit ang mas nakakaalarma ay ang walang pakundangan na promotion ng celebrity endorsers.
Partikular na sinita ni Rodriguez ang mga artista gaya nina Ivana Alawi, Alden Richards at Vice Ganda kung saan ang kanilang endorsements ay itinuturing umano na lifestyle content at ang sugal ay tila pinalalabas ligtas at hinahangad ng nakararami.
Buwelta naman niya sa mga bilyonaryong kumikita sa online gambling na itigil na ito at mahiya naman sila lalo't sa likod ng nakaeengganyong promotion ay ang pagkawasak ng maraming tahanan, ipon at kinabukasan.
