'Nothing personal'
Ito ang binigyang-diin ng PNP-Criminal Investigation and Detection Group (CIDG) matapos kumpirmahin na nagsampa ito ng kaso laban kay Congressman Kiko Barzaga kaugnay ng mga karahasang naganap sa Recto at Mendiola noong September 21.
Inihain sa Quezon City Prosecutor’s Office ang reklamo laban sa kongresista, kabilang na rito ang kasong Inciting to Sedition.
Bagaman hindi binanggit ni CIDG Acting Director MGen. Robert Alexander Morico II ang eksaktong partisipasyon ni Barzaga sa nangyaring karahasan, iginiit niyang bahagi ng mandato ng CIDG ang pagsasampa ng kaso na may malaking epekto o “great magnitude cases.”
Kabilang din aniya Barzaga sa 97 kataong unang kinasuhan kaugnay ng insidente, at mayroon ding hiwalay na kaso na inihain dahil sa naging partisipasyon nito sa isang rally kontra gobyerno sa Forbes Park.
Tiniyak ng opisyal na nagpapatuloy ang kanilang imbestigasyon sa iba pang sangkot, ngunit tumanggi siyang magbigay ng karagdagang komento hinggil sa mga detalye ng kaso.
