Hindi na raw tama at hindi na dapat payagan ang ikinikilos ni Cavite Fourth District Representative Kiko Barzaga.
Ito ang binigyang-diin ni House Deputy Speaker Ronaldo Puno kasabay ng pag-anunsyo ng National Unity Party o NUP na sinampahan na ng reklamo sa Committee on Ethics and Privileges si Barzaga.
Sa pulong balitaan, kinumpirma ni Puno na naghain na sila ng ethics complaint laban kay Barzaga para sa apat na grounds.
Una ay ang paglabag sa Section 141 ng Code of Conduct ng Kamara, paglabag sa Republic Act 6713 o ang Ethical Standards for Public Officials and Employees, paglabag sa Article 142 ng Revised Penal Code para sa inciting to sedition at Conduct prejudicial to the best interest of the service.
Binanggit ni Puno ang mga insidente na kinasasangkutan ng neophyte lawmaker na sumisira umano sa kredibilidad ng Kamara at paggamit ng official social media platforms para maliitin ang mga institusyon ng gobyerno.
Ikinuwento ng House leader na noong una ay pinalalampas lamang nila ang pag-uugali ni Congressman Kiko bilang ito ay anak ng kanilang dating presidente ng NUP na si Congressman Pidi Barzaga.
Pero isa sa naging mitsa ay ang pangongolekta umano ni Barzaga ng pirma para mapatalsik si Speaker Martin Romualdez.
Aminado rin si Puno na ang ipinupunto nila ay ang pamantayan ng pag-uugali ng tao na inaasahan sa mga miyembro ng House of Representatives.
Kapag hindi umano nila ito tinugunan ay mistulang pinabayaan na nila ang asta ng kahit sinong kongresista.
Samantala, nilinaw naman niya na hindi nila hinahabol si Barzaga at maging si Speaker Romualdez ay ayaw na gawin nila ito.
Gayunman, responsibilidad umano nila ang pangyayari dahil miyembro siya ng NUP at nilagdaan ni Puno ang certificate of nomination and acceptance para sa kanya.
