Siniguro ni Akbayan party-list Rep. Perci Cendaña na may sapat na mga pananggalang ang isinusulong na Lived Identities and Recognition Act o kung tawagin ay 'yung 'Sharmaine Bill' upang maiwasan ang anumang posibleng pang-aabuso rito.
Sa panayam ng Brigada NewsFM Manila kay Rep. Cendaña, ipinaliwanag nitong layunin ng panukala na gawing mas madali at abot-kaya ang proseso ng pagpapalit ng pangalan at gender marker para sa mga transgender, non-binary, at intersex na indibidwal sa pamamagitan ng administrative process sa Philippine Statistics Authority (PSA).
Ayon sa mambabatas, hindi maaaring basta-basta magpalit ng pangalan dahil kinakailangan ang mga dokumentong magpapatunay na matagal nang ginagamit ng aplikante ang nais na pangalan.
Maaari rin lamang itong gawin isang beses kada sampung taon at sasailalim pa sa beripikasyon upang matiyak na hindi ito gagamitin upang umiwas sa pananagutang legal.
Iginiit pa ni Cendaña na layunin ng panukala na kilalanin ang identidad ng isang tao habang pinananatili ang integridad ng sistema ng civil registration.
Tiniyak din niya na hindi ito makakaapekto sa umiiral na mga batas at mananatili ang mga legal safeguard upang maiwasan ang anumang pang-aabuso sa sistema.
Samantala, ipinaliwanag naman ni Cendaña na iba ang layunin ng Sharmaine Bill sa nauna nilang inihain na Cagandahan Bill.
Ang Cagandahan Bill aniya'y nakatuon sa pagpapadali ng proseso ng pagbabago ng sex marker sa birth certificate ng mga intersex person, habang ang Sharmaine Bill ay nakasentro sa pagkilala sa lived identity ng transgender, non-binary, at intersex individuals sa pamamagitan ng pagpapadali sa pagpapalit ng pangalan at gender sa mga officials documents.
#
