Hindi na dapat patulan ng Philippine Coast Guard ang panawagan ni Cavite Fourth District Representative Kiko Barzaga na i-abolish na ito.
Ito ang iginiit ni Bicol Saro Partylist Representative Terry Ridon matapos iapela ni Barzaga na buwagin na ang PCG dahil umano sa pagiging “corrupt organization” at aksaya sa kaban ng bayan.
Sa panayam sa Kamara, sinabi ni Ridon na hindi dapat pag-usapan kung dapat i-abolish ang PCG lalo’t sila ang tumitindig, nasasaktan at napeperwisyo sa bawat araw na nanggigipit ang China at gumagawa ng mga aktibidad sa sarili nating teritoryo.
Masyado na aniyang abala ang Coast Guard para magkomento sa aniya’y nakakatawang pahayag ni Barzaga.
Banat pa ng kongresista, sino ba si Barzaga na puro lang “meow meow” samantalang ang PCG ay ginagawa ang lahat para sa bayan.
Kabilang na rito ang pagharap sa pambobomba ng water cannons, pagkaputol ng daliri at pagbangga ng Chinese vessels.
Mababatid na sa isang video na naka-post sa social media ni Barzaga ay iginiit niyang nag-uudyok ng World War III ang mga operasyon ng PCG sa West Philippine Sea.
