Kinumpirma ni House Infrastructure Committee Co-chairman Terry Ridon na nag-move on na sila ni Senador Jinggoy Estrada sa isyu ng pagsasapubliko sa ilang personal na impormasyon sa social media.
Ayon kay Ridon, binura na ni Estrada ang kanyang social media post na naglabas ng lumang yearbook ni Ridon at nag-ugnay sa kanya kay dating Bulacan First District Engineering Office Assistant District Engineer Brice Hernandez.
Kaya naman minabuti na rin niyang tanggalin ang kanyang mga post sa sariling social media account.
Pero paglilinaw ni Ridon, hindi sila nagkausap nang personal ni Estrada.
Malaking bagay na aniya ang ginawang hakbang ni Estrada kaya mas tututok na lang sila sa mas mahahalagang isyu.
Mababatid na nakompromiso umano ang personal information ni Ridon kabilang ang buong pangalan, address ng bahay ng kanyang lola at telepono.
Itinanggi naman ni Ridon na magkaklase sila ni Hernandez at nilinaw na batchmate lamang sila sa Lourdes School of Quezon City.
