LUCENA CITY - Patay ang dalawa umanong gun-for-hire sa engkwentro laban sa mga pulis sa Sumilang, Calauag, Quezon pasado alas-3 ng hapon nitong Huwebes, August 21.
Kinilala ang isa sa mga suspek na si alyas Kenneth na kasama umano ang isa pang drug pusher na hindi pa rin nakikilala.
Ayon kay PCol. Romulo Albacea, Provincial Director ng PNP Quezon, sakay ang mga suspek sa isang AUV ang orihinal na target ng isinagawang buy-bust operation. Ngunit sa halip na tumigil sa checkpoint, pinaputukan umano ng mga suspek ang mga pulis at agad na tumakas.
Nagkaroon ng habulan at barilan hanggang sa mapatay ang dalawang suspek. Isa sa kanila ang nasawi sa loob ng sasakyan, samantalang ang isa ay bumagsak sa gilid ng kalsada matapos tamaan ng bala.
Wala namang naiulat na nasaktan sa hanay ng pulisya.
Dagdag pa ni Col. Albacea, sangkot umano ang mga napatay na suspek sa ilang kaso ng krimen at pagpatay sa bayan ng Sariaya, Candelaria, Tiaong, Quezon at Lucena City.
Sa kasalukuyan, patuloy pa rin ang imbestigasyon sa naturang insidente.
