Pinagpapaliwanag na ng Department of Environment and Natural Resources (DENR) si Davao City Mayor Sebastian “Baste” Duterte kaugnay ng umano'y iligal na pagtatambak ng basura sa loob ng compound ng DENR-Davao Region office.
Binigyan ng DENR ng limang araw ang alkalde upang magpaliwanag kung bakit hindi siya dapat managot sa insidente.
Bukod dito, naghain din ng hiwalay na reklamo ang DENR laban sa may-ari ng isang Mitsubishi Xpander na nakuhanan ng CCTV footage na umano'y nagbababa ng mga sako ng halo-halong basura sa naturang lugar.
Batay sa imbestigasyon ng ahensya, ang mga itinapong basura ay kinabibilangan ng commercial refuse at hindi rin ito naka-segregate, taliwas sa mga probisyon ng Ecological Solid Waste Management Act.
Bago ito, una nang sinabi ni Palace Press Officer Claire Castro na magsasagawa ng masusing imbestigasyon ang Department of the Interior and Local Government (DILG) kaugnay ng naunang pahayag ni Mayor Duterte na ipatapon sa harap ng tanggapan ng DENR ang mga hindi nakolektang basura sa lungsod.
Ayon pa kay Castro, sinabi ni Interior Secretary Jonvic Remulla na layunin ng imbestigasyon na matukoy kung may kapabayaan o paglabag sa mga batas pangkalikasan na nagawa ni Duterte o iba pang mga opisyal ng Davao City.
