Inabisuhan ni Department of Education (DepEd) Secretary Sonny Angara ang mga paaralan na i-maximize pa ang mga Parent Teacher Associations (PTA) upang maging katuwang sa pagpigil sa mga karahasan sa paaralan.
Kasunod ito ng mga naiulat na karahasan sa loob ng schools kamakailan.
Ayon kay Angara, hindi kayang mag-isa ng paaralan na masiguro ang siguridad ng mga estudyante.
Pananagutan umano ng lahat ang kaligtasan ng mga bata, at ang PTA ang isa sa pinakamahalagang tulay na nagdurugtong sa pamilya, paaralan, at komunidad.
Hinikayat din ni Angara ang mga paaralan na gamitin ang mga PTA assemblies at mga pagpupulong upang talakayin ang attendance, behavior, mental health, anti-bullying initiatives, responsible digital citizenship, at iba pang mga usapin hinggil sa siguridad ng mga mag-aaral.
Sinabi pa ng kalihim na dapat magkaroon ang mga PTA ng mga parenting seminars, digital safety orientation, values formation activities, at pakikipagtulungan ng mga komunidad sa mga lokal na pamahalaan, mga samahang pangkabataan at mga propesyunal.
Sinabi rin niya na ang pinakamalakas na siguridad sa karahasan ay ang komunidad na totoong nakakikilala sa mga kabataan nito.
Sa huli, sinabi ni Angara na kung ang mga magulang at mga guro ay may malimit na komunikasyon, kung ang mga paaralan ay nakikipagtulungan sa lokal na pamahalaan, at kung batid ng mga mag-aaral na mapagkakatiwalaan nila ang mga nakatatanda sa kanila, nakalilikha ang lipunan ng kapaligirang mabilis makaalam sa mga problema, at ang bawat kabataan ay panatag sa kaniyang kaligtasan, suportado, at pinahahalagahan.
