Ipinag-utos na ng Department of Education ang agarang imbestigasyon sa umano'y insidente ng bullying sa Bagong Silangan National High School sa Quezon City.
Ito'y matapos mag-viral kagabi sa social media ang isang video kung saan pinagtulungang sabunutan ang isang grade 8 student ng kanyang kapwa studyante.
Ayon kay Dennis Legaspi, Chief ng Media Relations ng DepEd, nakatakda na ang isang pulong kasama ang Child Protection Committee ng paaralan upang matiyak na mabibigyan ng sapat na pagkakataon ang biktima at iba pang mga mag-aaral na sangkot sa insidente upang magpahayag ng kanilang panig.
Patuloy na tinututukan ng DepEd ang insidenteng ito at nagsusulong ng mga hakbang upang matiyak ang kaligtasan at proteksyon ng lahat ng mag-aaral laban sa bullying sa mga paaralan.
