Nagpulong sina Foreign Affairs Secretary Ma. Theresa Lazaro at United States Secretary of State Marco Rubio ngayong araw.
Tinalakay ng parehong opisyal ang bilateral economic at security priorities kabilang ang ASEAN chair year ng Pilipinas.
Maliban dito ay napag-usapan din ng mga ito ang pagtataguyod ng kapayapaan at seguridad sa South China Sea.
Ayon pa kay Lazaro, napagtuunan sa kanilang pagpupulong ang pagpaapatibay ng economic diplomacy, at ang pagpapatibay ng maritime cooperation at shared commitment sa pagpapanatili ng kapayapaan at katatagan sa rehiyon, at pagdidiin sa kahalagahan ng diplomatic channels para maiwasan pang lumala ang tensyon.
Sinabi naman ng U.S. Embassy in the Philippines na target pang mas palalimin ng parehong bansa ang partnership sa gitna ng pagdiriwang ng 80 taon ng diplomatic relations, at 75 taon ng alyansa.
Samantala, bago ito, nakipagpulong din si Lazaro kay US Ambassador-designate to the Philippines Lee Marc Lipton sa Washington DC sa harap ng nalalapit nitong pagbisita sa bansa ngayong buwan.
