Aminado ang Department of Information and Communications Technology (DICT) na parang 'mouse and cat game' ang pagsugpo sa mga naglipanang text scams sa bansa.
Ayon kay DICT Secretary Ivan Uy, hindi na raw dumidepende ngayon ang mga scammers sa cellsite ng mga telco provider, kaya nakakapag pakalat pa rin sila ng text scam sa kabila ng Sim Registration Act.
Gumagamit daw ang mga scammers ng text hijacking device o pekeng cellsite, dito nakokonekta ang signal ng cellphone ng publiko sa halip na sa totoong cellsite ng mga telco provider.
Madali lang daw bitbitin ang naturang equipment kaya ang madalas na ginagawa ng scammer ay tatambay sa mga lugar na madalas maraming tao tulad ng mall.
Bukod pa rito ang text blasting device na ginagamit rin para makapagpadala ng mensahe sa mga may hawak ng cellphone malapit sa device.
Nilinaw ng Kalihim na illegal ang mga ganitong uri ng equipment at kadalasan ini-smuggle lang daw ito papasok sa bansa.
Aminado rin si Uy na maging ang ilang mga pulitiko ay gumagamit ng text blasting device sa kanilang pangangampanya.
Kaya naman nasa proseso na rin daw ang DICT sa pag-acquire ng mga makabagong system at equipment upang matugunan ang problema sa mga scammers.
Kasabay nito hinimok ni Uy ang publiko na huwag basta maniniwala sa matatanggap na mensahe upang hindi mabiktima ng mga scammers.
