Kinumpirma ni Information and Communications Technology Secretary Henry Aguda na 96% na ng mga pampublikong paaralan sa bansa ang may access sa libreng wifi.
Sa isang panayam, sinabi ni Aguda na nakikipag-ugnayan ang Deparment of Information and Communications Technology (DICT) sa Department of Education (DepEd) hinggil dito, at target nilang makamit ang 100% internet connectivity sa mga public schools sa iba't ibang panig ng Pilipinas sa loob lang ng tatlong linggo.
Ayon sa kalihim, ang hakbang na ito ay pangako nila sa pangulo sa nagdaang SONA nito.
Ngayon, ang dapat aniya nang maging laman ng SONA ng presidente ay ang 100% connectivity ng mga DepEd schools.
Dahil nasa 96% na raw sila rito, nira-rush na nila ang natitira pang 4%.
Sa huli, idiniin ni Aguda na priority nila ang learning content para sa mga mag-aaral, at nananatili umanong naka-block ang Roblox at Gorebox sa mga school Wi-Fi network.
Samantala, nakatakda namang mas palawakin pa ng DICT ang Wi-Fi program sa mas marami pang pampublikong lugar gaya ng mga mall at palengke.
