Patuloy ang paalala ng Digital Pinoys sa publiko, partikular na sa mga fans ng Kpop group na BTS, na mag-ingat sa scalpers at mga pekeng online sellers na nambibiktima ng mga taong hindi naka-secure ng ticket nang mag-selling para sa concert nito.
Ayon kay Digital Pinoys National Campaigner Ronald Gustilo, dahil sold out na ang ticktes, ang mga fake sellers, scammers, at oportunistang mga scalpers ay posibleng manamantala sa mga desperadong fans ng grupo na naghahanap ng ticket.
Aniya, paulit-ulit na nilang nakita ang pattern na ito.
Sa sandali raw na ma-sold out ang tickets, agad na maglilipana ang mga manloloko sa social media platforms, online marketplaces, at messaging applications at nag-o-offer ng fake tickets.
Dahil dito, kailangan umano na maging mapagbantay ang mga fans, at iwasang maging biktima ng modus.
Sa huli, sinabi ni Gustillo na ang mga concerts ay dapat maging pagdiriwang ng mga fans, at hindi isang oportunidad para sa mga scammers at scalpers na kumita.
Nanawagan din ang Digital Pinoys sa mga otoridad, ticketing platforms, social media companies, at mga mambabatas na magtulungan upang maprotektahan ang mga konsyumer.
