Tahasang inihayag ni Department of the Interior and Local Government (DILG) Secretary Jonvic Remulla ang kaniyang mungkahi na buwagin na ang Sangguniang Kabataan (SK) sa bansa dahil sa hindi na pagganap ng mga opisyal sa kanilang tungkulin.
Paliwanag ng kalihim, sa mahigit 42,000 barangay sa buong Pilipinas 50 % ng mga SK council ang hindi na gumagana pagkatapos pa lamang ng unang taon ng kanilang panunungkulan.
Binigyang-diin ni Remulla na marami sa mga nahalal na kabataang lider ang nawawalan ng pokus sa kanilang tungkulin dahil sa pagiging abala sa pag-aaral, pag-aasawa, o kaya naman ay paglipat ng tirahan sa ibang lugar.
Sinabi ni Remulla na masyadong mataas ang attrition rate ng SK, partikular na sa mga lalawigan, kung saan nawawalan ng saysay ang representasyon ng kabataan sa lokal na pamahalaan.
Sakali umanong hindi tuluyang mabuwag ang SK, iminungkahi rin ng kalihim ang pagbuo ng mga bagong estratehiya upang matiyak na magiging epektibo at makabuluhan ang youth empowerment sa bansa sa halip na manatili sa kasalukuyang sistema.
