Hiniling ni Interior Secretary Jonvic Remulla sa National Police Commission (NAPOLCOM) ang isang taong extension sa serbisyo ni Police Brigadier General Hansel Marantan, na kasalukuyang Regional Director ng Police Regional Office 4A (CALABARZON).
Nakatakda sanang magretiro si Marantan ngayong July 2026.
Sa liham ni Remulla sa NAPOLCOM, sinabi nitong ang kahilingan ay ginawa "in the interest of the service" upang matiyak ang pagpapatuloy ng critical at high-impact operations na kasalukuyang pinangungunahan ni Marantan.
Sa naging pahayag naman ni Marantan, sinabi niyang ikinararangal at lubos niyang pinahahalagahan ang tiwala at kumpiyansang ipinakita sa rekomendasyon para sa isang taong extension ng kanyang serbisyo.
Gayunman, kinilala niyang nakasalalay pa rin ito sa pag-apruba ng mga kinauukulang awtoridad at sinabi niyang igagalang niya anuman ang maging pinal na desisyon ukol dito.
