Nilinaw ng Department of Energy (DOE) na ang pagbibigay ng Iran ng safe passage sa mga barko at seafarers ng Pilipinas sa Strait of Hormuz ay hakbang para maprotektahan ang suplay ng langis at kaligtasan ng mga Pilipino, ngunit hindi ito agad magpapababa ng presyo ng gasolina at diesel sa bansa.
Ayon kay Energy Secretary Sharon Garin, makatutulong ang kasunduan upang mabawasan ang panganib ng pagkaantala ng suplay at masiguro ang ligtas na pagdaan ng mga barko, lalo na sa gitna ng tensyon sa Middle East. Gayunman, hindi nito agad maaayos ang mataas na presyo ng langis.
Ipinaliwanag din niya na kahit sa Singapore at Korea kumukuha ng suplay ang Pilipinas, ang mga bansang ito ay gumagamit din ng langis na dumaraan sa Strait of Hormuz, kaya mahalaga pa rin ang seguridad ng rutang ito.
Binigyang-diin ni Garin na hindi man ito perpektong solusyon, isa itong mahalagang hakbang upang mapanatili ang tuloy-tuloy na suplay ng langis sa gitna ng global crisis.
