Magkatuwang na kikilos ang Department of Justice (DOJ) at Office of the Presidential Adviser on Peace, Reconciliation and Unity (OPAPRU) para tugunan ang patuloy na clan feuds o rido sa Bangsamoro Autonomous Region in Muslim Mindanao.
Bubuo ang dalawang ahensya ng isang Technical Working Group na mag-aaral kung paano maaaring isaalang-alang ang mga lokal na peace settlement sa pagresolba ng mga kasong kriminal na may kaugnayan sa rido.
Layunin nitong balansehin ang umiiral na proseso ng hustisya at ang mga tradisyunal na mekanismo ng pag-aayos ng sigalot sa komunidad.
Batay sa datos ng pamahalaan, umabot sa 161 incidents ng rido at iba pang community-based conflicts ang naitala mula 2023 hanggang April 2026, na indikasyon umanong nananatiling banta ang ganitong sigalot sa kapayapaan at seguridad sa BARMM at mga karatig na lugar.
Ayon sa DOJ, hindi layunin ng inisyatiba na palitan ang legal na proseso kundi pag-aralan kung paano ito magiging “peace-sensitive,” lalo na sa mga lugar na may matagal nang alitan ng mga pamilya o komunidad.
Sasali sa working group ang mga kinatawan mula sa BARMM Ministry of Public Order and Safety, DILG, PNP, LGUs, at mga kinatawan ng traditional justice.
Nakatakdang magsumite ng rekomendasyon ang grupo sa loob ng 45 araw mula sa pagpirma ng kasunduan, kaya saad ni Justice Secretady Fredderick Vida, tutukan sana ng publiko ang kanilang trabaho.
