Pinawi ng Department of Justice (DOJ) ang pangamba kaugnay sa timing ng imbestigasyon ng National Bureau of Investigation sa umano’y iregularidad sa 2019 Southeast Asian Games, kabilang ang New Clark City sports complex at ang kontrobersyal na cauldron.
Ito ay matapos kuwestiyunin ni Senador Pia Cayetano kung posibleng ginagamit ang imbestigasyon upang maimpluwensyahan o ma-distract ang mga senador na nagsisilbing senator-judges sa impeachment trial ni Vice President Sara Duterte.
Ayon ka DOJ Spokesperson Atty. Polo Martinez, iginagalang ng ahensya ang pananaw ng senador, ngunit tiniyak na ang mga hakbang ng NBI ay nakabatay lamang sa mandato at rule of law, at walang ibang layunin.
Dagdag pa ni Martinez, may buong kumpiyansa sila na isasagawa ng NBI ang imbestigasyon nang professional at may integridad.
Binigyang-diin din ng DOJ na may sapat na operational independence ang NBI upang magsagawa ng sariling imbestigasyon, kahit pa ito ay attached agency ng ahensya, at maaaring kumilos batay sa sarili nitong pagsusuri o kahit walang direktang referral.
Ayon kay NBI Director Melvin Matibag, sinisilip ng mga imbestigador ang ulat ng nasa P10 bilyong hindi pa naliliquidate na pondo, pati ang alegasyon na may mga proyektong isinagawa nang walang public bidding.
