Nakipag-ugnayan na ang DOJ sa Office of the Regional Prosecutor ng Region VIII upang matukoy ang buong detalye ng insidente, kasunod ng direktiba ni Pangulong Ferdinand Marcos Jr. na magsagawa ng masusing imbestigasyon.
Ayon kay DOJ Spokesperson Raphael Niccolo Martinez, kasalukuyang pinangungunahan ng Tacloban City Police Office ang imbestigasyon sa koordinasyon ng Office of the City Prosecutor of Tacloban.
Tinutukoy na rin ng mga awtoridad ang pagkakakilanlan ng mga biktima, nasugatan, at mga sangkot, pati na ang motibo at pangyayari sa likod ng pamamaril.
Kinumpirma rin ng DOJ na dalawang menor de edad ang nasa kustodiya kaugnay ng insidente, kaya’t paiiralin nila ang lahat ng legal safeguards, lalo na sa paghawak ng mga batang sangkot sa kaso bilang mga children in conflict with the law.
Habang nagpapatuloy ang imbestigasyon, sinabi ng DOJ na hahayaan muna nilang tapusin ng mga law enforcement at piskal ang pagbusisi sa lahat ng ebidensya bago maglabas ng karagdagang impormasyon, kasabay ng pangakong pananagutin ang mga responsable sa trahedya.
