Piniling huwag munang magbigay ng komento ang Department of Justice (DOJ) kaugnay ng isyung itinaas sa impeachment proceedings laban kay Vice President Sara Duterte.
Kasunod ito nang kwestiyunin ni Sen. Erwin Tulfo sa impeachment court kahapon ang umano’y matagal na usad sa sedition case ng bise sa DOJ.
Ayon sa mambabatas, lagpas isang taon na ang naturang imbestigasyon, bagay na aniya’y hindi karaniwan at maaaring indikasyon ng problema sa kaso.
Pero iginiit ni Justice Spokesperson Polo Martinez, iiwas muna ang ahensya na magsalita sa mga usapang tinalakay o may kaugnayan sa naturang proseso, bilang paggalang sa impeachment court.
Gayunman, nilinaw ng ahensya na nananatiling nasa ilalim ng imbestigasyon ang reklamong isinampa laban sa bise presidente at aaksyunan ito sa tamang panahon alinsunod sa due process.
Ipinunto naman ni Sen. Erwin na dapat tiyakin ng National Bureau of Investigation na matibay o “airtight” ang mga kasong isinasampa bago ito dalhin sa DOJ upang mabilis itong maresolba ng ahensya.
