Maglalabas ng bagong identification cards ang Department of Social Welfare and Development para sa mga persons with disability upang labanan ang pagkalat ng pekeng PWD IDs.
Ayon kay DSWD Assistant Secretary Irene Dumlao, layunin ng bagong ID system na tugunan ang reklamo laban sa mga gumagamit ng pekeng PWD IDs na nakakaapekto sa pagbibigay ng benepisyo sa mga lehitimong PWD.
Tinatayang umabot sa P88.2 bilyon ang nawalang kita ng pamahalaan noong 2023 dahil sa maling paggamit ng mga pekeng ID.
Ang bagong PWD IDs ay may physical at digital versions na parehong madaling ma-verify online. May RFID at QR code din ito para masiguro ang seguridad at maiwasan ang pamemeke.
Sa ngayon, isinasagawa na ng DSWD ang pilot implementation sa 35 lungsod at munisipalidad sa bansa.
Target ng ahensya na mailunsad ang nationwide implementation bago matapos ang taon, depende sa resulta ng pilot run.
