Naglabas ng warning ang Department of Social Welfare and Development (DSWD) laban sa mga manloloko at nagsasabing benepisyaryo sila ng ahensya, o kaya naman ay nagpapakilalang "survivors" sila ng trahedya.
Ito ay kasunod ng pagkaaresto sa isang lalaki na nagpanggap na isa sa mga nakaligtas sa gumuhong gusali sa Angeles City, Pampanga para makakuha ng pagkain at tulong-pinansyal – mga bagay na nakalaan sa mga pamilyang apektado ng insidente.
Kwento ng lalaki, bumibili siya ng inumin sa isang malapit na tindihan nang gumuho ang building noong May 24; pero batay sa validation, ang naturang indibidwal ay hindi residente sa lugar o konektado sa construction site o kahit na sinong biktimang apektado ng pangyayari.
Sa isang pahayag sinabi ni Assistant Secretary Irene Dumlao na ang sinumang mapatutunayang nagsinungaling o nagpanggap upang makatanggap ng ayuda ay mananagot sa ilalim ng mga umiiral na batas.
Dagdag pa nito, nakikipag-ugnayan na sila sa mga awtoridad habang pinag-aaralan ang mga posibleng kasong maaaring isampa laban sa nasabing indibidwal.
Hindi umano nila palalampasin ang anumang pagtatangka na ilihis ang limitadong resources na para sana sa mga tunay na biktima ng trahedya.
