Nagpapatuloy pa rin ang imbestigasyon ng Department of Social Welfare and Development (DSWD) Region 12 sa insidente ng isang tatay na nambatok sa kanyang anak matapos hindi manalo sa push bike competition sa Surallah.
Sa panayam ng Brigada NewsFM Manila kay DSWD 12 Regional Director Loreto Cabaya, sinabi nitong pupuntahan na ngayong araw ang bahay ng pamilya sa Polomolok, South Cotabato.
Ito ay para personal na suriin ang sitwasyon at makita ang kalagayan ng bata.
Kasama sa pagdalaw ang pakikipag-ugnayan sa ina at iba pang kamag-anak ng bata, pati na rin ang medical at psychological evaluation nito, at masuri ang kalagayan ng bata sa puder ng mga magulang.
Layunin umano na matukoy kung may dati na bang naganap na pang-aabuso at kung ligtas pang manatili sa kustodiya ng ama ang bata.
