Naglabas ang Department of Trade and Industry (DTI) ng “Gabay sa Pamimili ng School Supplies” para sa School Year 2026-2027 upang matulungan ang mga mamimili na maikumpara ang presyo ng mga pangunahing gamit sa paaralan.
Kabilang sa mga nakasaad sa price guide ang mga notebook, pad paper, lapis, ballpen, krayola, pambura, pantasa, at ruler.
Batay sa pinakahuling abiso ng DTI, nasa P13 hanggang P52 ang presyo ng writing at composition notebook, habang P13 hanggang P37 naman ang grade pad paper.
Naglalaro naman sa P12 hanggang P18 kada piraso ang lapis at P3 hanggang P21 kada piraso ang ballpen.
Samantala, mula P12 hanggang P114 ang presyo ng krayola depende sa dami ng kulay.
Ayon sa DTI, layunin ng price guide na mabigyan ng mas maraming pagpipilian ang mga mamimili habang namimili para sa nalalapit na pasukan.
Paalala rin ng ahensya sa publiko na suriin ang mga label at detalye ng produkto upang matiyak ang kalidad at tamang impormasyon ng kanilang binibili.
