CAMARINES SUR - Muling ipinaaalala ng Municipal Police Station ng Caramoan, Camarines Sur, lalo na sa mga mangingisda na huwag gagawa ng dynamite fishing o magpabomba sa karagatan at iwasan ang iba pang illegal fishing activities sa bayan, bagkus ay dapat na protektahan.
Sa panayam kay PCPT Junel Cea, Officer In Charge, mahigpit kasing minomonitor ito kasama ang Coast Guard, Bantay Dagat, miyembro ng Advocates of Reefs For Life Foundation dahil sa masamang dulot nito sa kalikasan. Maliban sa nasisira ang mga coral reef, nababawasan ang pagdami ng mga isda na posibleng maging problema sa hinarahap kung papabayaan.
Bagamat kinumpirma ni Cea na wala pang napag-alamang may nagpabomba maging sa karatig bayan, nais nilang makasiguro na walang nangyayaring patago, iniiwasan din kasing makakuha ng supply mula sa ibang bayan na posibleng mula sa iligal na pangingisda kaya nagkakaroon din ng intelligence gathering at pagbabantay sa merkado. Isa pa may mga namonitor na ng illegal fishing matapos gumamit ng maliit na lambat.
Ayon pa sa opisyal, maaaring makulong sa kasong Republic Act 8550, o The Philippine Fisheries Code of 1998 ang sinomang mahuhuli, kaya naman mas mabuting sumunod na lamang sa batas na ang mas makikinabang lang din naman ay ang mamamayan.
