Isinusulong ni Parañaque City Second District Representative Brian Yamsuan ang panukalang batas na layong palawakin ang outpatient coverage ng Philippine Health Insurance Corporation o PhilHealth para sa mga kaso ng chronic kidney disease.
Batay sa House Bill 6310, tututukan ng expanded coverage ang prevention at early detection ng CKD at para masigurong sakop ng PhilHealth ang mga pasyente nang hindi kailangang sagutin ang gastusin sa pagpapagamot.
Ayon kay Yamsuan, nakakaalarma ang pagtaas ng kaso ng CKD sa mga mas batang Pilipino na may edad dalawampu hanggang limampu't siyam.
Binigyang-diin nito na hindi na dapat hintayin pang maging full-blown public health crisis ang CKD.
Nakasaad sa panukala na aatasan ang PhilHealth na isama sa coverage ang lahat ng gastos ng CKD patients para sa maintenance, dialysis treatment kabilang ang gamot, professional fees at pambayad sa ospital alinsunod sa rules at regulations ng Universal Health Care Act.
Kapag naging ganap na batas ay mahigpit na ipatutupad ang No Balance Billing policy.
Magkakaroon naman ng early screening at pagpapalaganap sa publiko hinggil sa CKD habang ang lahat ng renal replacement therapy facilities ay iuulat ang incidence at prevalance ng mga pasyenteng dumaranas ng dialysis treatment at kidney transplants bilang requirement sa renewal ng license to operate.
Samantala, para masuportahan ang homebased peritoneal dialysis ay binibigyang-diin ng panukala ang paglulunsad ng training sa medical at non-medical personnel kabilang ang barangay health workers.
