NAGA CITY — Tinitingnang sanhi ngayon sa nangyaring sunog sa isang bahay sa Concepción Grande, Naga City, ayon sa Bureau of Fire Protection, ang faulty electrical wiring.
Sa initial na imbistigasyon ng BFP Naga, ayon kay Investigator, Senior Fire Officer 1 Marvin Nebres, bago pa man magsimula ang apoy ay una nang may naamoy na tila nasusunog ang isa sa mga nakatira sa bahay. Tumutugma naman ito sa nakita sa ocular inspection ng mga bombero.
Mag-aalas nueve kagabi nang mabulabog ang mga natutulog na sanang residente matapos sumiklab ang isang makapal at mapaminsalang sunog na mabilis tumupok sa mga gamit ng isang pamilya at ikinasawi pa ng isang alagang aso.
Sa kasalukuyan, nabigyan na ng pansamantalang matutuluyan ang mga nasunugan, tumatanggap at naglilikom na rin ng karagdagang tulong ang barangay upang muling makabangon ang pamilya ng biktima ng sunog.
Ang Brigada News FM Naga ay bukas rin sa mga magpapadala ng in kind donation tulad ng mga damit, pagkain, at construction materials na pangunahing kailangan ngayon ng pamilya upang makapagpatuloy muli lalo pa’t wala silang naisalbang mga gamit.
