Inilunsad sa Quezon City ang pamamahagi ng rice assistance para sa mga pamilyang kabilang sa vulnerable sectors.
Nasa 1,200 benepisyaryo mula sa Barangay Doña Imelda ang tumanggap ng tig-10 kilong bigas sa ilalim ng programang pinondohan ng Local Government Support Fund (LGSF).
Ayon kay Quezon City Mayor Joy Belmonte, naglaan ang Office of the President ng P462.9 milyong pondo para sa rice subsidy program na inaasahang makikinabang ang 210,455 pamilya o katumbas ng halos 25 porsyento ng kabuuang bilang ng mga pamilya sa lungsod.
Sinabi rin ni Belmonte na nakatutulong ang programa sa mga lokal na magsasaka dahil direktang binibili ng lungsod ang kanilang ani sa pamamagitan ng mga kooperatiba alinsunod sa Sagip Saka Act.
Ang paamamahagi ay pinangunahan ni First Lady Louise Araneta-Marcos sa ilalim ng programang "Mula sa Puso Para sa Pamilya."
Dalawa pang tranche ng pamamahagi ng bigas ang isasagawa sa Quezon City upang makumpleto ang apat na yugto ng programa.
Samantala, sinabi naman ni San Juan City Mayor Francis Zamora, pangulo ng Metro Manila Council, na palalawakin din ang kahalintulad na programa sa iba pang lungsod sa Metro Manila hanggang Nobyembre ngayong taon.
