Mananatiling simple at walang lalakarang red carpet sa idaraos na State of the Nation Address o SONA ni Pangulong Bongbong Marcos ngayong taon.
Ngayong araw ay nagsagawa ng walkthrough ang mga opisyal mula sa Malacanang, Senado at House of Representatives sa plenaryo bilang paghahanda ilang linggo bago ang SONA ng pangulo.
Ayon kay House Secretary-General Cheloy Garafil, mas mababa ang gastos sa SONA 2026 kumpara noong nakaraang taon.
Aminado rin si Garafil na nakaagaw ng atensyon sa kanilang preparasyon ang impeachment trial ni Vice President Sara Duterte.
Kadalasan aniya ay nasa 1,800 ang bilang ng bisita na pumapasok sa plenary hall para panoorin ang SONA at tulad ng nakagawian, lahat ay sasailalim sa mahigpit na security check pati na ang mga nasa labas.
Samantala, nasa final stages na ang improvements sa main staircase at hallways ng main building habang sinamantala na rin ang pagkakataon na isailalim sa rehabilitasyon ang mga bubong at iba pang imprastraktura.
Matapos ang konsultasyon sa inter-agency planning meetings, walang magiging pagbabago sa seating arrangements, guest capacity at holding areas.
