Pinag-iingat ng EcoWaste Coalition ang publiko, lalo na ang mga mamimili laban sa pagbili ng ilang pabango na umano’y naglalaman ng ipinagbabawal na kemikal, kasabay ng nalalapit na pagdiriwang ng Father’s Day.
Ayon sa grupo, may ilang pabango sa merkado na naglalaman ng butylphenyl methylpropional (BMHCA) o lilial, isang sangkap na ipinagbawal na sa European Union at ASEAN dahil sa posibleng panganib nito sa reproductive health.
Batay sa kanilang monitoring, ilan sa mga natukoy na produkto ay mga imitasyon ng kilalang perfume brands na ibinebenta sa mababang halaga.
Dahil dito, muling iginiit ng EcoWaste Coalition ang kahalagahan ng pagbili ng mga produktong may pahintulot mula sa Food and Drug Administration (FDA) at pag-iwas sa mga pekeng produkto na maaaring magdulot ng panganib sa kalusugan.
Hinikayat din ng grupo ang publiko na maging mapanuri sa label, presyo, at packaging ng mga pabangong binibili upang makaiwas sa posibleng banta sa kalusugan.
