Binigyan ng Federation of Free Farmers (FFF) ang administrasyon ni Pangulong Ferdinand Marcos Jr. ng markang barely passing hanggang fail sa naging pagganap nito sa sektor ng agrikultura at pangisdaan mula nang magsimula ang panunungkulan nito noong 2022.
Ayon sa FFF, nanatiling halos hindi umunlad ang sektor sa kabila ng mas malaking budget ng Department of Agriculture, pagdami ng mga undersecretary, at iba pang programa ng pamahalaan.
Anila, mabagal ang paglago ng produksyon ng palay at lalo pa umanong uumasa ang bansa sa imported na bigas at iba pang produktong agrikultura.
Iginiit din ng grupo na hindi nakapagpababa ng presyo sa merkado ang Executive Order No. 62 na nagbaba ng taripa sa bigas, mais, baboy, at manok, sa halip nagpababa umano ito sa kita ng mga lokal na magsasaka at livestock producers.
Nagpahayag din ng pangamba ang FFF sa patuloy na liberalisasyon ng kalakalan, pagpasok ng komersyal na pangingisda sa municipal waters, at mabagal na pagpapatupad ng repormang agrarian.
Bagama't kinilala nito ang pagpapatibay ng New Agrarian Emancipation Act, sinabi ng grupo na marami pang pangako ng administrasyon sa agrikultura ang hindi pa natutupad, kabilang ang suporta sa mga magniniyog, pagtugon sa land conversion, at pagpapalakas ng kabuhayan ng mga magsasaka at mangingisda.
