Arestado ang tatlong manggagawa ng isang resort sa Pagbilao, Quezon matapos umanong nakawin at katayin ang isang bihirang arapaima na tinatayang nagkakahalaga ng P7 milyon, na balak nilang paghati-hatian at kainin.
Ayon sa pulisya, ang nasabing isda ay may timbang na 90 kilo, may habang 6.7 talampakan, at tinatayang nasa 25 taong gulang.
Batay sa imbestigasyon, palihim umanong kinuha ng mga suspek ang arapaima mula sa palaisdaan ng resort at dinala sa isang bahay sa loob ng lugar kung saan ito nila kinatay.
Nadiskubre ang ginawa ng mga suspek matapos silang makita ng isang saksi na agad na ipinaalam sa resort management at security personnel.
Nasa kustodiya na ng pulisya ang tatlong salarin habang inihahanda ang kaukulang kaso.
Mababatid na ang arapaima ay kabilang sa pinakamalalaking freshwater fish sa mundo at itinuturing na isang bihirang species na nangangailangan ng proteksyon at wastong dokumentasyon dahil sa usapin ng konserbasyon.
