Maaaring maapektuhan ang nasa 520,000 ektarya ng mga pananim sa malaking bahagi ng bansa dahil sa pananalasa ng bagyong Kiyapo at habagat.
Ayon sa Department of Agriculture (DA), ang mga pinaka-maapektuhang lugar na may tanim na palay at mais ang Cordillera Administrative Region (CAR) Regions 1, 2, 6, at 11.
Tinatayang 251,754 ektarya ng mga palayan at 268,776 ektarya ng mga taniman ng mais ang maaaring maapektuhan ng masamang panahon.
Batay sa datos ng DA, nasa vegetative stage ang 51.18% ng mga palayan, habang 36.48% naman ang nasa seedling stage, kaya mas mataas ang posibilidad na maapektuhan ang mga ito ng malalakas na pag-ulan at pagbaha.
Sa kabila nito, sinabi naman ng ahensya na maaari ring maging kapaki-pakinabang ang mga pag-ulan dulot ng bagyo sa sektor ng agrikultura, lalo na sa mga lugar na nakararanas ng tuyong kondisyon.
