Kinumpirma ng Coast Guard District Palawan na narekober ng Coast Guard Station Eastern Palawan (CGS EP) na may namataang hinihinalang rocket debris na napadpad sa baybayin ng Sitio Taburon, Barangay Balading, Bisucay Island, Cuyo, Palawan.
Natanggap umano ang ulat hinggil dito bandang 6:46 ng umaga, dahilan para magpakalat ng Quick Response Team (QRT).
Narekober ang naturang debris sa tulong ng mga tauhan ng barangay, at na-secure na ito sa Coast Guard Station Eastern Palawan.
Samantala, magsasagawa naman ng technical assessment at validation ang Maritime Security and Law Enforcement Group Palawan (MARSLEG-PAL) upang matukoy ang identity at pinagmula ng object.
Sa huli, tiniyak ng PCG sa publiko na nakalatag na ang kanilang safety measures habang nagpapatuloy ang imbestigasyon.
