Binigyang-diin ni Senadora Risa Hontiveros na mahalaga naman talagang maging physically present sila sa loob ng sesyon ng Senado lalo't kung mayroon silang importanteng isyu na pinagtatalunan.
Ayon kay Hontiveros, mahalagang nandoon sila para mapangatawanan ang kanilang adbokasiya o argumento.
Maalala, sa naging sesyon sa Senado, kabilang si Hontiveros sa mga tumayo para tutulan ang mungkahi ni Senador Rodante Marcoleta na amyendahan ang Senate rules at payagan ang pagsali ng mga senador sa sesyon sa pamamagitan ng teleconference, video conference at iba pang electronic communications.
Ani Hontiveros sa isang panayam, wala siyang nakikitang rason para gawin ito bilang wala namang national emergency katulad ng pandemya para gawin ito.
Kasunod naman ng paglutang sa social media ng resolusyon na kanilang isinulong noon para kay dating senadora Leila De Lima para makasali ito sa plenary session at committee hearings via online, sinabi niya na magkaiba naman ang sitwasyon ng dating senadora kay Senador Ronald Bato Dela Rosa.
Anya, kung babalikan, nagpakita noon si De Lima ng pagrespeto sa legal authority dahil sumuko ito at humarap noon sa awtoridad samantala ang kasama raw nilang senador ngayon ay nagpapakita ng kawalan ng respeto.
Dagdag pa niya, kung maalala, noong 2021 ay panahon din ng pandemya kaya lahat sila ay naka-teleconferencing.
