Tiwala si House Lead Prosecutor Gerville Luistro sa senator-judges na lilitis sa impeachment case laban kay Vice President Sara Duterte.
Tugon ito ni Luistro sa pulong balitaan hinggil sa posibleng epekto ng mga nakabinbing kaso sangkot ang ilang senador sa pagsasagawa ng impeachment proceedings.
Ayon sa pinuno ng Committee on Justice, walang kinalaman sa impeachment proceeding ang mga naturang kaso at hiwalay mula sa proseso.
Lahat aniya ng mga isinasangkot ay may karapatan sa ilalim ng Konstitusyon na maging “presumed innocent” hanggang mapatunayang guilty.
Kaya naman ipinunto nito na kahit may pending cases, mananatiling pantay-pantay ang pagkilala ng prosecution panel sa senator-judges.
Paliwanag ng kongresista, batid naman nila na labing-anim ang kailangan ng conviction ngunit limitado ang kanilang tungkulin sa pagpiprisinta ng ebidensya.
Sa kabila nito, binigyang-diin ni Luistro na mananatiling may pananagutan sa mga Pilipino ang prosekusyon at ang senator-judges, at magmamatyag sa proceedings ang taumbayan.
Responsibilidad umano ng senator-judges ang kanilang magiging pasya sa impeachment trial.
Dagdag niya, kung sakaling malakas ang ebidensya at ang desisyon ay acquittal, aalalahanin ito ng publiko lalo’t malaki ang kanilang interes sa paglilitis ni Duterte.
