Ikinokonsidera na ng House prosecution panel na hilingin sa Senate Impeachment Court na palawigin ang pre-trial conference hanggang sa weekend partikular sa Sabado.
Sa pulong balitaan, sinabi ni House prosecutor Joel Chua na batid nilang hanggang Huwebes lang ang pasok ng Senado ngunit masyadong makapal ang mga dokumentong isasailalim sa marking of exhibits.
Kaya naman nakikipag-ugnayan na aniya sila kay Senate Secretary Renato Bantug na siyang Clerk of Court para pahintulutan na ituloy ang marking of exhibits hanggang sa Biyernes o Sabado.
Ipinaliwanag din ni House Lead Prosecutor Gerville Luistro na sa confidential funds pa lang, nasa 1,900 exhibits ang isasailalim sa marking para sa Department of Education, habang mahigit dalawang libo para sa Office of the Vice President.
Bukod sa extension ng pre-trial conference, ihihirit ng prosecution panel na payagan ang pagdadagdag ng teams na tututok sa marking of exhibits.
Punto pa ni Luistro, isa sa mga itinuturing na “time consuming” ang hiling ng defense team na payagan ang hiwalay na marking ng common exhibits lalo’t paghahambingin pa ang mga dokumento bago tatakan.
Samantala, nananatiling on track para sa prosecution team na sa July 6 masisimulan ang trial proper dahil ang pre-trial order ay inilalabas sampung araw pagkatapos ng pre-trial conference.
