Palaisipan para sa House prosecution team kung bakit hinihiling ng kampo ni Vice President Sara Duterte na daanin sa executive session ang pagbubukas ng selyadong kahon ng Bureau of Internal Revenue o BIR.
Sa pulong balitaan, kinuwestyon ni prosecutor Leila de Lima kung bakit kailangan pa ng executive session gayong maaari namang magtalaga ng isang team na tututok sa marking of exhibits o sa pagpapabukas ng kontrobersyal na kahon.
Sinasabing nais ng defense team na huwag munang isapubliko o panatiling confidential ang mga dokumentong nilalaman ng naturang kahon.
Binigyang-diin ni de Lima na wala pang usapin ng admissibility o relevance sa pagbubukas ng kahon at saka na dapat pagtalunan ang confidentiality provisions.
Sa ngayon ay karapatan umano ng prosecution team na mamarkahan ang kahon dahil kasama ito sa listahan ng kanilang ebidensya.
Pero nilinaw ni Prosecution Legal Spokesperson Atty. Benjamin Tolosa Jr. na positibong hakbang pa rin ang pagbabago ng paninindigan ng kampo ni Duterte tungo sa transparency.
Ipauubaya aniya nila sa impeachment court ang pagresolba sa mga kondisyong itinakda ng defense panel para maiwasan ang pagkaantala ng paglilitis.
