Handang-handa na ang House prosecution panel sa pagsisimula ng impeachment trial ni Vice President Sara Duterte sa July 6.
Sa panayam kay Lead Prosecutor Gerville Luistro sa ginanap na Mass for Truth, Justice and Accountability sa Quezon City, sinabi nitong 19th Congress pa lang ay naghahanda na sila.
Inaasahan aniya sa Lunes na maririnig ang opening statements ng dalawang panig at reresolbahin ang mga nakabinbing mosyon.
Kasabay nito, nanawagan si Luistro sa mga Pilipino na makiisa sa panalangin para sa conviction ni Duterte sa paglilitis dahil “deserve” ng bansa ang mas mabubuting leader.
Sana ay tumindig umano ang mamamayan sa panig ng prosekusyon hanggang sa pagtatapos ng proceedings sa Senate impeachment court.
Kinilala rin ng kongresista ang limitasyon, pagkukulang at “imperfections” ng prosecution panel ngunit mas makapangyarihan ang dasal at suporta.
Sa kabila nito, umapela pa rin si Luistro sa publiko na ipagdasal ang defense team, ang senator-judges at ang bansa.
Samantala, kinumpirma ni private prosecutor Atty. Lorna Kapunan na nakapaghain na sila ng komento sa pre-trial order at masaya umano sila sa nilalaman nito.
Limampu’t pitong witnesses ang inilista ng prosekusyon habang mahigit dalawampu sa defense at ang unang presentation sa paglilitis ay ang Article IV na may kinalaman sa assassination plot o grave threats.
