Pinunan na kasusarong aldaw an house-to-house inventory kan populasyon sa laog kan 7-8 kilometers Extended Danger Zone kan Bulkang Mayon sa Legazpi City. An aktibidad iyo an pinangenotan kan Albay Public Safety and Emergency Management Office komo parte kan preparasyon asin padagos na monitoring sa mga komunidad na nasa peligro.
Kaibahan sa mga barangay na sakop kan imbentaryo an Bonga, Buyoan, Matanag, Mabinit, asin Padang. Obheto kaining makakuha nin updated na datos kan mga residente sa laog kan Extended Danger Zone nganing magamit sa disaster preparedness asin response planning.
Nagin katuwang man sa aktibidad an mga Barangay Health Workers, Sangguniang Kabataan Federation, asin mga opisyal kan barangay nganing masiyerto an maray asin marekas na pagkalap nin mga impormasyon hale sa mga residente.
Photo: APSEMO
