Nakabalik na sa bansa ang huling Filipino crew member ng M/V CMA CGM San Antonio matapos makalabas ng ospital at mabigyan ng clearance upang makauwi sa Pilipinas.
Dumating ito sa Ninoy Aquino International Airport (NAIA) noong Hunyo 15 at emosyonal na muling nakasama ang kanyang pamilya matapos ang pinagdaanang pagsubok sa ibang bansa.
Sinalubong siya ng mga kinatawan ng Department of Migrant Workers (DMW), Overseas Workers Welfare Administration (OWWA), at ng kanyang licensed manning agency na agad nagbigay ng kinakailangang tulong at asistencia.
Ayon sa DMW, sasailalim pa ang seafarer sa medical examination at psychosocial counseling bilang bahagi ng kanyang recovery.
Matatandaang kabilang siya sa mga tripulanteng sakay ng M/V CMA CGM San Antonio na tinamaan ng drone attack habang naglalayag sa Strait of Hormuz noong nakaraang taon.
