Iginiit ng International Criminal Court (ICC) na patas ang kanilang isinasagawang imbestigasyon laban kay dating pangulong Rodrigo Duterte.
Ayon sa ICC, inakusahan si Duterte ng mga prosecutor bilang lider ng Davao Death Squad noong alkalde pa ito ng Davao City hanggang maging Pangulo ng Pilipinas.
Sa warrant of arrest na inilabas noong March 7, 2025, sinabi ng ICC na na napagpasyahan ng Pre-Trial Chamber na makatarungan ang mga reklamo at mga isinagawang imbestigasyon laban sa dating Pangulo dahilan para ito arestuhin.
Ang pag-aresto aniya kay Duterte ay isang mahalagang hakbang para panagutin ang mga sangkot sa madugong giyera kontra droga.
Sa ngayon, naghahanda na ang ICC para sa mangyayaring pagdinig kaugnay sa kaso ni dating Pangulong Duterte.
Nagpasalamat din ang ICC sa kooperasyon ng mga biktima, nakaligtas, at saksi sa madugong giyera kontra droga ng dating administrasyon.
